Տոնեք Հիսուս Քրիստոսի Սուրբ Ծնունդը մեզ հետ՝ այս Սուրբ Ծննդյան տոնաշրջանում

Մենք հավատում ենք, որ Հիսուս Քրիստոսը ընտրվել էր Աստծո կողմից դեռևս աշխարհի ստեղծումից առաջ՝ լինելու Փրկիչը, որը հաղթելու էր մեղքին ու մահին՝ բոլորիս համար։ Աստծո մարգարեները՝ ներառյալ Եսայի և Միքիա մարգարեները Հին Կտակարանում, ինչպես նաև Ալման և Սամուելը Մորմոնի Գրքում, օգնել են մարդկանց ուրախությամբ սպասել Փրկչի գալուստին, այդ թվում՝ Փրկչի Հարությանից հետո Նրա այցելությանը Ամերիկա մայրցամաք։

Խոնարհ մսուրում Մարիամը «ծնեց իր անդրանիկ որդուն, խանձարուրի մեջ փաթաթեց, դրեց մսուրի մեջ, որովհետև իջևանատանը նրանց համար տեղ չկար» (Ղուկաս 2․7): Քիչ մարդիկ գիտեին, որ Նա Աստծո իրական Որդին էր, որը Իր երկրային կյանքի ընթացքում պիտի դառնար սիրո և խոնարհության կատարյալ օրինակ։ Այսօր մենք տոնում ենք Նրա ծնունդը՝ ձգտելով հետևել այդ օրինակին։

Հիսուս Քրիստոսի ծննդյան գիշերը հրեշտակները Նրա ծնունդն ավետեցին խոնարհ հովիվներին, որոնք եկել էին այցելելու մանկանը: Ավելի հարուստ «մոգերը» թանկարժեք ընծաներ բերեցին երկար ճամփորդությունից հետո: Հետագայում կանայք, օրինակ՝ ջրհորի մոտ գտնվող սամարացի կինը, վկայեց մեր Փրկչի դերի մասին, իսկ Մարիամ Մագդաղենացին վկայեց Նրա հարության մասին: Սկզբից ի վեր Հիսուս Քրիստոսին հետևելը բոլորի համար է եղել՝ անկախ սոցիալական կարգավիճակից, տարիքից, սեռից կամ ռասայից:

Իր ծնունդից հետո Հիսուս Քրիստոսն ապրեց մեղքից զերծ կյանքով։ Նա ուսուցանեց մեզ, թե ինչպես հետևել Աստծո ծրագրին, գործեց հրաշքներ, բժշկեց և մխիթարեց մարդկանց։ Երբ եկավ երկրային ծառայությունն ավարտելու ժամանակը, Փրկիչը տառապեց և մահացավ մեր մեղքերի համար ու հարություն առավ մեռելներից, որպեսզի մենք կարողանանք կրկին ապրել Աստծո և մեր ընտանիքների հետ։ Նա ապրում ու սիրում է մեզ և մի օր կրկին կվերադառնա երկիր։