Մորմոնի Գիրքը ոգեշնչված սուրբ գրությունների գիրք է, որն ուղղություն է ցույց տալիս մեր կյանքում և մեզ կապում է Հիսուսի հետ: Որտեղի՞ց է ծագում գրքի անունը: Հարյուրավոր տարիներ առաջ հնագույն Ամերիկա աշխարհամասում Մորմոն անունով մի մարգարե կազմում է իր ժողովրդի հիշատակարանը: Նրանք բախվեցին նույն մարտահրավերներին, որոնց մենք ենք բախվում: Եվ մեզ նման նրանք ուժ գտան, երբ դիմեցին Հիսուս Քրիստոսին:

Մորմոնի Գիրքը կարող եք կարդալ Աստվածաշնչի հետ մեկտեղ՝ որպես Հիսուս Քրիստոսի և աշխարհի Փրկիչ ու Քավիչ Նրա աստվածային առաքելության ևս մեկ վկայություն: Աստվածաշունչը և Մորմոնի Գիրքը միասին տալիս են ավելի շատ հասկացողություն մեր բոլորի հանդեպ Աստծո մեծ սիրո մասին և կարող են օգնել մեզ ավելի մոտենալ Նրան:

Աստվածաշնչի նման Մորմոնի Գիրքը նույնպես վկայում է Հիսուս Քրիստոսի մասին Մորմոնի Գրքում արձանագրված գլխավոր իրադարձությունը Հիսուս Քրիստոսի այցելությունը, ուսմունքները և ծառայությունն է հնագույն Ամերիկաների հավատացյալներին։ Այս պատմությունը ցույց է տալիս, որ Աստված տալիս է նույն օրհնություններն ու հնարավորությունները Իր բոլոր զավակներին, և որ Նրա սերը չի սահմանափակվում աշխարհի մեկ տարածքում ապրող մարդկանցով: Անկախ նրանից, թե ինչ լեզվով ենք խոսում կամ ինչ տեսք ունենք, Աստված սիրում է մեզ և ցանկանում է, որ մենք ավելի մոտենանք Իրեն:

Ահա Մորմոնի Գրքում պատմված հազարամյա էպիկական պատմության համառոտագիրը.

Ըստ էության, Մորմոնի Գիրքը պատմություն է մի ընտանիքի մասին: Այդ ընտանիքի հայրը՝ Լեքին, մարգարե է հին Երուսաղեմում: Աստված երազում զգուշացնում է Լեքիին, որ վերցնի իր ընտանիքը և հեռանա Երուսաղեմից, քանի որ քաղաքը և նրա բնակիչները շուտով գերի կընկնեն մեկ այլ ազգի կողմից: Նրանք կտրում են օվկիանոսը և գնում Ամերիկա: Լամանը և Լեմուելը, ավագ որդիները, չեն հավատում, որ իրենց հայրը՝ Լեքին, ոգեշնչված է եղել: Նրանք միշտ բողոքում են։ Նրանց կրտսեր եղբայրը՝ Նեփին, լի է հավատքով: Նեփին ընտրվում է Աստծո կողմից՝ առաջնորդելու իր ընտանիքը և լինելու նրանց ուսուցիչը:

Ժողովուրդն ի վերջո բաժանվում է երկու խմբի՝ նեփիացիների և լամանացիների: Այս խմբերը հաճախ պատերազմում են, և նրանց հավատքը մշտապես փորձության է ենթարկվում: Այդ հավատքը Մորմոնի Գրքի էջերը լրացնում է հզոր քարոզների, մարգարեությունների, կյանքի դասերի և հոգևոր փորձառությունների տեսքով:

Այն բանից հետո, երբ Հիսուսը հարություն է առնում Երուսաղեմում, Նա հայտնվում է Ամերիկա մայրցամաքում գտնվող մարդկանց: Նա ուսուցանում է նրանց մկրտության, ապաշխարության և ներման մասին: Նա բուժում է նրանց հիվանդներին և օրհնում նրանց երեխաներին: Նա հիմնում է Իր Եկեղեցին: Ի տարբերություն Երուսաղեմի բնակիչների՝ մարդիկ լսում են Հիսուսին։ Դրանից հետո նրանք հարյուրավոր տարիներ ապրում են խաղաղության մեջ։ Ժամանակի ընթացքում մարդիկ կորցնում են իրենց հավատքը, և Մորոնի անունով մի մարգարե թաղում է նրանց հիշատակարանները, որպեսզի պահպանի դրանք ապագա ժամանակի և մարդկանց համար՝ մեզ համար: Ջոզեֆ Սմիթին ցույց են տրվում այդ հիշատակարանների տեղը և նա Մորմոնի Գիրքը թարգմանում է Աստծո զորությամբ: Նրա ուսմունքները մեծացնում են Հիսուս Քրիստոսի հանդեպ հավատքը և ոգեշնչում են միլիոնավոր մարդկանց այսօր:

Եկեղեցու ծառայության ժամերը տարբեր հավաքատներում տարբեր են: Սակայն, դուք միշտ կարող եք ակնկալել երկրպագության մեկ ծառայություն բոլորի համար, որին հաջորդում են երեխաների, երիտասարդների և մեծահասակների համար նախատեսված դասերը:

Բոլորի համար կատարվող ծառայությունը կոչվում է հաղորդության ժողով: Այս ժողովը բաղկացած է երգերից, աղոթքներից և քարոզներից (կամ «ելույթներից»), որոնք ամեն կիրակի տրվում են համայնքի տարբեր անդամների կողմից: Բայց ժողովի ամենակարևոր մասը հաղորդության ընդունումն է (որը նման է պատարագին)՝ ի հիշատակ Փրկչի: